နယူးဇီလန်ရဲတပ်ဖွဲ့သည် လူများအား အိမ်၊ လမ်းနှင့် လူမှုအသိုင်းအဝိုင်းတွင် လုံခြုံစွာနေထိုင်နိုင်စေရန် ဝန်ဆောင်မှုများကို ပေးဆောင်သည်။ ရဲတပ်ဖွဲ့သည် 24 နာရီ အချိန်ပြည့်တာဝန်ယူကာ ရာဇဝတ်မှုများနှင့် အန္တရာယ်များကို ကာကွယ်ရန် လုပ်ဆောင်သည်။ ၎င်းတို့သည် ဝန်ထမ်းအင်အား 15,000 ခန့်ဖြင့် မြို့ပြနှင့် ကျေးလက်ဒေသများရှိ ရဲစခန်းများတွင် တာဝန်ထမ်းဆောင်ပါသည်။

ရဲတပ်ဖွဲ့သည် ကြည်း၊ ရေ၊ လေ တာဝန်ယူကာ တစ်နှစ်လျှင် အဖြစ်အပျက် 1.3 သန်းကျော်ကို တုံ့ပြန်ပါသည်- အရေးပေါ်ဖုန်းခေါ်ဆိုမှု 925,000 ကျော်နှင့် ပုံမှန်ဖုန်းခေါ်ဆိုမှု 743,000 ကျော်ကို ဖြေကြားပေးခဲ့ပါသည်။

ရဲဝန်ထမ်းများသည် နယူးဇီလန်ရှိ လူတိုင်းအား ကူညီရန် နှင့် ကာကွယ်ရန် လေ့ကျင့်ထားသည်။ ရဲတပ်ဖွဲ့၏ ဝန်ဆောင်မှုများကို လူ့အခွင့်အရေးကို လေးစားစွာဖြင့် လွတ်လပ်စွာ နှင့် တရားမျှတစွာ ပေးဆောင်သည်။

ရဲတပ်ဖွဲ့၏ အဓိကတာဝန်များတွင် တားဆီးခြင်း၊ စုံစမ်းစစ်ဆေးခြင်း၊ ဖြေရှင်းခြင်း၊ ရာဇဝတ်မှုလျော့ချခြင်းနှင့် ယာဥ်တိုက်မှုများ ပါဝင်ပါသည်။ ရဲတပ်ဖွဲ့၏ တာဝန်များတွင် ပါဝင်သည်တို့မှာ-

• ရပ်ရွာအေးချမ်းမှုကို ထိန်းသိမ်းခြင်း
• ပြည်သူ့လုံခြုံရေးကို ထိန်းသိမ်းခြင်း
• ဥပဒေစိုးမိုးရေး
• ရာဇဝတ်မှုကာကွယ်ရေး
• အသိုင်းအဝိုင်းအား ပံ့ပိုးကူညီခြင်း
• အမျိုးသားလုံခြုံရေး
• နယူးဇီလန်ပြင်ပ ရဲလုပ်ငန်းများတွင် ပါဝင်ခြင်း
• အရေးပေါ်အခြေအနေစီမံခန့်ခွဲမှု

တိုင်းရင်းသားလူမျိုးများနှင့် ချိတ်ဆက်ရေးအရာရှိများ (Ethnic Liaison Officers)

ရဲတပ်ဖွဲ့သည် ကွဲပြားမှုများကို တန်ဖိုးထားသည်။ တိုင်းရင်းသားလူမျိုးများအား ပံ့ပိုးရန် တိုင်းရင်းသားလူမျိုးများနှင့် ချိတ်ဆက်ရေးအရာရှိများကို နိုင်ငံတဝှမ်းတွင် ခန့်ထားသည်။ ၎င်းတို့သည် အသိုင်းအဝိုင်းများနှင့် ပူးပေါင်းကာ ရဲတပ်ဖွဲ့၏ ဝန်ဆောင်မှုများကို နားလည်ရန် နှင့် အသုံးပြုရန် ကူညီပေးသည်။ ရဲတပ်ဖွဲ့အား အသိုင်းအဝိုင်းစိုးရိမ်ပူပန်မှုများအကြောင်း အချက်အလက်များ ပေးပို့ပြီး တိုင်းရင်းသားလူမျိုးများနှင့် သက်ဆိုင်သော ရာဇဝတ်မှုများကို စုံစမ်းစစ်ဆေးရန် နှင့် ကာကွယ်ရန် လုပ်ဆောင်သည်။

သင့်စိုးရိမ်ပူပန်မှုများကို နားထောင်ရန် နှင့် လုံခြုံရေးတိုးတက်စေရန် အတူတကွလုပ်ဆောင်ရန် ကျွန်ုပ်တို့၏ ဝန်ထမ်းများ အမြဲတမ်းအဆင်သင့်ရှိသည်။

သင့်အား လူကိုယ်တိုင် သို့မဟုတ် အွန်လိုင်းတွင် ခြိမ်းခြောက်မှုများ ပြုလုပ်ပါက သို့မဟုတ် သင့်အား သို့မဟုတ် အခြားသူများအား ကြောက်ရွံ့စေပါက ရဲတပ်ဖွဲ့သို့ ဆက်သွယ်ပါ။ ၎င်းတွင် လူမျိုး၊ ဘာသာ၊ လိင်စိတ်ခံယူမှု၊ မသန်စွမ်းမှု သို့မဟုတ် အသက်အရွယ်ကဲ့သို့သော အကြောင်းရင်းများဖြင့် ရန်လိုမှုများ ပါဝင်နိုင်သည်။

နယူးဇီလန်နိုင်ငံသားအားလုံးသည် ၎င်းတို့၏ ပတ်ဝန်းကျင်ကို သတိထားပြီး သံသယဖြစ်ဖွယ် သို့မဟုတ် ပုံမှန်မဟုတ်သော အပြုအမူများကို အာဏာပိုင်များထံ အစီရင်ခံသင့်သည်။

111 အရေးပေါ်ရဲဖုန်း-

အောက်ပါအခြေအနေများတွင် 111 ကို ခေါ်ဆိုကာ ရဲတပ်ဖွဲ့အား အကူအညီတောင်းပါ-

• လူများ ဒဏ်ရာရရှိခြင်း သို့မဟုတ် အန္တရာယ်ရှိခြင်း
• အသက် အန္တရာယ်ရှိခြင်း သို့မဟုတ် ပိုင်ဆိုင်မှုပစ္စည်းများအပေါ် ချက်ချင်း သို့မဟုတ် ရုတ်တရက် ကြီးမားသော အန္တရာယ်ရှိခြင်း။ ရာဇဝတ်မှုတစ်ခု ဖြစ်ပွားနေခြင်း သို့မဟုတ် ဖြစ်ပွားပြီးချိန်တွင် ပြစ်မှုကျူးလွန်သူများ နေရာတွင် ရှိနေခြင်း။

105 ပုံမှန်သတင်းပို့ရန် ရဲဖုန်း-

အချိန်နှင့်တပြေး ဆောင်ရွက်ရန်မလိုသော အချက်အလက်များအတွက် သံသယဖြစ်ဖွယ် သို့မဟုတ် ပုံမှန်မဟုတ်သော အပြုအမူများကို အောက်ပါနည်းလမ်းများဖြင့် အစီရင်ခံနိုင်သည်-

• အွန်လိုင်းအစီရင်ခံစာ ဖြည့်သွင်းခြင်းကို 105.police.govt.nz တွင်ပြုလုပ်ပါ၊ သို့မဟုတ် ပုံမှန်သတင်းပို့ရန် ဖုန်းနံပါတ် 105 သို့ ဆက်သွယ်ပါ။
• အနီးဆုံးရဲစခန်းသို့ သွားရောက်ခြင်း
• Crime Stoppers ကို 0800 555 111 သို့ ဆက်သွယ်ခြင်း

ရဲတပ်ဖွဲ့နှင့် စကားပြောလိုပါက 105 ကို မည်သည့်ဖုန်းမှမဆို ခေ်ဆိုနိုင်သည်။ ၎င်းသည် နိုင်ငံတစ်ဝှမ်း အခမဲ့ဝန်ဆောင်မှုဖြစ်ပြီး 24/7 ရနိုင်ပါသည်။ 105 သို့ ဖုန်းခေါ်ဆိုမရပါက အွန်လိုင်း https://www.police.govt.nz/use-105 ကို ဆက်သွယ်ပါ။

နယူးဇီလန် လုံခြုံရေးထောက်လှမ်းရေးဌာန (NZSIS) သည် နယူးဇီလန်၏ ပြည်တွင်းလုံခြုံရေးထောက်လှမ်းရေးဌာနဖြစ်သည်။ ၎င်း၏ ရည်မှန်းချက်မှာ နယူးဇီလန်နှင့် ဤနေရာတွင် နေထိုင်သူအားလုံးအား လုံခြုံစွာနေထိုင်စေရန် ဖြစ်သည်။

NZSIS သည် နယူးဇီလန်၏ အမျိုးသားလုံခြုံရေးအား ခြိမ်းခြောက်မှုများကို စုံစမ်းစစ်ဆေးသော အများပြည်သူဆိုင်ရာ ဝန်ဆောင်မှုဌာနဖြစ်သည်။ အဓိပ္ပါယ်မှာ နယူးဇီလန်အား လွတ်လပ်ပြီး ဒီမိုကရေစီကျသော လူ့အဖွဲ့အစည်းအဖြစ် ကာကွယ်ရန် လုပ်ဆောင်သည်။ ၎င်းသည် နယူးဇီလန်၏ နိုင်ငံတကာဆက်ဆံရေးနှင့် စီးပွားရေးတည်ငြိမ်မှုကိုလည်း ကာကွယ်ပေးသည်။

၎င်းသည် နယူးဇီလန်၏ ပြည်တွင်းလုံခြုံရေးအဖွဲ့အစည်းဖြစ်ပြီး ထောက်လှမ်းရေးအဖွဲ့အတွက် ဦးဆောင်သူဖြစ်သည်။ ဆိုလိုသည်မှာ ထိုအဖွဲ့သည် လူမျိုးစုံနှင့် စကားပြောဆိုပြီး အချက်အလက်များ ရယူပါသည်။ NZSIS မှရသော ထောက်လှမ်းရေးအချက်အလက်များကို အစိုးရနှင့် မူဝါဒချက်မှတ်သူတို့  ဆုံးဖြတ်ချက်ချမှတ်ရာတွင် မှန်ကန်ကောင်းမွန်စေရန် ထောက်ပံ့ပေးသည်။

NZSIS အခြားသောတာဝန်မှာ အစိုးရအဖွဲ့များနှင့် အခြားအဖွဲ့များအား သူတို့၏လူများ၊ အချက်လက်များနှင့် ပိုင်ဆိုင်မှုများအား အမျိုးသားလုံခြုံရေး အန္တရာယ်များမှ ကာကွယ်ရန်ဖြစ်သည်။

NZSIS ၏ အဓိက ဦးတည်ချက်များမှာ-

• နိုင်ငံခြားဝင်ရောက်စွက်ဖက်မှု၊ ထိုထဲတွင် နိုင်ငံခြားတိုင်းပြည်တစ်ခုခု၏ စေခိုင်းမှုဖြင့် လူမျိုးနွယ်စုများအပေါ် ပြစ်မှတ်ထားလှုပ်ရှားခြင်းလည်း ပါဝင်ပါသည်။
• သူလျှိုလုပ်ငန်း
• အကြမ်းဖက်ဝါဒနှင့် အကြမ်းဖက်မှု

NZSIS သည် နယူးဇီလန်ရဲတပ်ဖွဲ့နှင့် အစိုးရဆက်သွယ်ရေးလုံခြုံရေးဗျူရို (GCSB) တို့နှင့် နီးကပ်စွာ ပူးပေါင်းလုပ်ဆောင်သည်။ ၎င်း၏မစ်ရှင် တစ်စိတ်တစ်ပိုင်းအဖြစ် လူမှုအသိုင်းအဝိုင်းများ၊ iwi Māori၊ ဒေသန္တရအစိုးရ၊ ပညာရေးကဏ္ဍ၊ စီးပွားရေးလုပ်ငန်းများနှင့် အဖွဲ့အစည်းများနှင့်လည်း လုပ်ဆောင်သည်။

၎င်းသည် ထောက်လှမ်းရေးနှင့် လုံခြုံရေးအက်ဥပဒေ 2017 ဟုခေါ်သည့် တရားဥပဒေအတိုင်း ပြုမူဆောင်ရွက်ပါသည်။ ထိုဥပဒေက NZSIS သည် ဥပဒေနှင့်အညီ လုပ်ဆောင်နေကြောင်း၊ နိုင်ငံရေးအရ ကြားနေဖြစ်ပြီး လူ့အခွင့်အရေးသတ်မှတ်ချက်များ လိုက်နာကြောင်း သေချာစေပါသည်။ NZSIS သည် နယူးဇီလန်အစိုးရမှ သတ်မှတ်ထားသော ထောက်လှမ်းရေး ဦးစားပေးမှုများနှင့်အညီ လုပ်ဆောင်ရမည်ဖြစ်သည်။

NZSIS သည် မည်သူတစ်ဦးတစ်ယောက်ကိုမျှ ဖမ်းဆီးခြင်း သို့မဟုတ် ထိန်းသိမ်းခြင်းမပြုနိုင်ပါ။ ထို့အပြင် လူများကို ၎င်းတို့၏ယုံကြည်မှု၊ နိုင်ငံသားဖြစ်မှု၊ သို့မဟုတ် တရားဝင်ဆန္ဒပြမှုတွင် ပါဝင်ခြင်းကြောင့် စုံစမ်းစစ်ဆေးခြင်းမပြုပါ။

ပြည်သူ့ဝန်ဆောင်မှုဌာနများအားလုံးကဲ့သို့ပင်၊ NZSIS သည် တရားမျှတမှုရုံး (Ombudsman)၊ ကိုယ်ရေးကိုယ်တာကော်မရှင်နာ၊ စာရင်းစစ်ချုပ်ရုံးနှင့် ပြည်သူ့ဝန်ဆောင်မှုကော်မရှင်အတွက် တာဝန်ခံပါသည်။

NZSIS သည် ထောက်လှမ်းရေးနှင့် လုံခြုံရေး၏ စစ်ဆေးရေးမှူးချုပ် (Inspector-General) ထံမှ လွတ်လပ်ခိုင်မာသော ကြီးကြပ်မှုကိုလည်း ခံယူပါသည်။ ၎င်း၏တာဝန်မှာ တိုင်ကြားချက်များကို စုံစမ်းစစ်ဆေးရန်နှင့် ထောက်လှမ်းရေးအေဂျင်စီများ ဥပဒေအတိုင်း မှန်ကန်စွာဆောင်ရွက်ကြောင်း သေချာစေရန်အတွက် စုံစမ်းမှုများ ပြုလုပ်ရန်ဖြစ်သည်။ NZSIS သည် နယူးဇီလန်၏ပါလီမန်နှင့် ၀န်ကြီးများအတွက်လည်း တာဝန်ရှိပါသည်။

ပိုမိုလေ့လာရန် -Home | New Zealand Security Intelligence Service

သတင်းရယူနေရန် - Engagement | New Zealand Security Intelligence Service

တိုင်ကြားမှုပြုရန် - Reporting a national security concern

အစိုးရဆက်သွယ်ရေး လုံခြုံရေးဗျူရို (GCSB) သည် အချက်ပြထောက်လှမ်းရေးအတွက် နယူးဇီလန် ၏ ဦးဆောင်အေဂျင်စီဖြစ်သည်။ အီလက်ထရွန်နစ် ဆက်သွယ်ရေးမှ ရရှိသော ထောက်လှမ်းရေးအချက်အလက်ကို ဆိုလိုသည်။

ဤထောက်လှမ်းရေးသည် ၎င်းတို့၏ လုပ်ငန်းဆောင်ရွက်မှုနှင့် ဆုံးဖြတ်ချက်ချခြင်းကို ပံ့ပိုးရန် အစိုးရအေဂျင်စီများကို ထောက်ပံ့ပေးထားသည်။ GCSB သည် ပြည်ပမိတ်ဖက်များ အထူးသဖြင့် သြစတြေးလျ၊ အမေရိကန်၊ ဗြိတိန်နှင့် ကနေဒါတို့မှ ထောက်လှမ်းရေးအချက်အလက်များကို လက်ခံရရှိပါသည်။ GCSB နှင့် နိုင်ငံရပ်ခြားထောက်လှမ်းရေးတို့ ပေါင်းစပ်ထားသော ဤပူးပေါင်းမှုသည် နယူးဇီလန်အား ကမ္ဘာ့ရေးရာများကို နားလည်စေပြီး အမျိုးသားလုံခြုံရေး ခြိမ်းခြောက်မှုများကို စီမံခန့်ခွဲရန် ကူညီပေးသည်။

GCSB သည် GCSB အတွင်းရှိ လုပ်ငန်းယူနစ်ဖြစ်သည့် အမျိုးသားဆိုင်ဘာလုံခြုံရေးဌာန (NCSC) မှတဆင့် ဆိုက်ဘာလုံခြုံရေးအတွက် ဦးဆောင်လုပ်ငန်းဆောင်ရွက်သည့်အေဂျင်စီလည်းဖြစ်သည်။ NCSC သည် နယူးဇီလန်နိုင်ငံသားအားလုံးအတွက် ဆိုက်ဘာလုံခြုံရေးဝန်ဆောင်မှုများကို - တစ်ဦးချင်းမှသည် အသေးစားနှင့်အလတ်စားစီးပွားရေးလုပ်ငန်းများနှင့် အဖွဲ့အစည်းများ၊ လုပ်ငန်းကြီးများ၊ အစိုးရနှင့် နိုင်ငံအလိုက် အရေးပါသောအဖွဲ့အစည်းများအထိ ဝန်ဆောင်မှုပေးပါသည်။

Own Your Online သည် လူတစ်ဦးချင်းစီနှင့် အသေးစားနှင့် အလတ်စားစီးပွားရေးလုပ်ငန်းများအတွက် ဆိုက်ဘာလုံခြုံရေးဆိုင်ရာ အကြံဉာဏ်နှင့် လမ်းညွှန်မှုများကို ပံ့ပိုးပေးသည့် NCSC ၏ ဝဘ်ဆိုဒ်ဖြစ်သည်။ ဆိုက်ဘာလုံခြုံရေးဖြစ်ရပ်ကို သတင်းပို့ရန် Own Your Online သို့မဟုတ် အမျိုးသားဆိုက်ဘာလုံခြုံရေးစင်တာသို့ သွားရောက်ပါ။